Na istoku Sjeverne Makedonije u toku je evakuacija stanovništva zbog velikih požara. U kavadarskom selu Fariš požar je zahvatio vinograde, a vatrena stihija prijeti i kućama i crkvama, prenosi makedonski portal “Plusinfo”.Zbog pojave velikih šumskih požara, Vlada Republike Sjeverne Makedonije uvela je dvadesetčetvoročasovnu zabranu kretanja u šumama i šumskim područjima.

Vatrogasci iz Teritorijalne protivpožarne jedinice u Kavadarcima ulažu maksimalne napore kako bi ugasili požar. Vatrena stihija u selu Rosoman već je zahvatila crkva i groblje, a približava se i prvim kućama u selu. U selu Sasa, na istoku Sjeverne Makedonije, evakuišu se mještani koji žive u blizini naselja Trakanica i Adžite. Angažovan je veliki broj ljudskih i tehničkih resursa kako bi se zaštitilo stanovništvo. Sve je izvjesnija opcija da će biti neophodno avionsko gašenje požara. Takođe je Prespanski region, kao i turistička naselja Oteševo i Sirhan, zahvaćen velikim požarom, kao i dio makedonskog nacionalnog parka Galičica.

Požar je zahvatio oko 300 hektara šume, voćnjake i trske oko jezerske obale.

“Cijela Prespa je u vatri. Gorjelo je kod Oteševa i Sirhana, prvo trska oko jezera, a potom je vjetar proširio požar na šumu. Vatra se širi ka nacionalnom parku Galičica. Nemamo struju, a zapalio se i dalekovod“, kaže jedan od vlasnika vile u Sirhanu.

Gradonačelnik Resena Živko Gošarevski izjavio je da je sada situacija stabilnija.